المرأة الخارقة !

  







انتى مش SUPER WOMAN !!!
انتى مش SUPER HERO !!

لو كان ربنا عايزك تكونى كده كان ادالك Super Powers..

كان خلقك بجناحات عشان تطيرى.. بقدرات خارقة.. انك مثلاً تحركى الحاجة بمجرد ما تفكرى فيها أو انك توقفى الزمن عند لحظة معينة !! بس احنا ما تخلقناش كده ..
اتخلقنا فينا ضعف و قوة و أمل و يأس و حب و كره و تحمل و عدم تحمل..مسحتى بأستيكة نقط ضعفك ليه مع انها ساعات مصدر قوتك !!

ليه مصرة تقومي بأدوار مش أدوارك و تخالفى سنة الحياة و فطرة الكون...انت كده بتثبتى ايه لنفسك ؟؟
انك قادرة تدمرى صحتك بكمية التاسكات اللى وراكى عشان بس تبقى جامدة او عشان تصعبى على اللى حواليكى..جو الصعبانيات ده مش بيأكل عيش !!! و هيتعبك انتي أكتر واحدة..

انتي عايزة تشغلي شغل بيتك كله و تخلي بالك من ولادك و تربيهم و تذاكريلهم و تعملي كل مشاوير البيت و تقضي كل المصالح و تلتزمي بشغل بره و متخيلة ان غلط تقولي انا تعبت او مش قادرة؟؟
اومال ربنا مقسم الادوار بين الراجل و الست ليه و مخلي لكل واحد فينا طبيعة مختلفة عن التاني ليه؟؟

مين فهمك انك غلط تقولى تعبت !!
مين فهمك انك لازم تشيلى فوق طاقتك عشان تبقى جدعة و يتضرب بيكى المثل فى تحمل المسئولية !!
لو شيلتى انهارده و قدرتى بكرة عمرك ما هتقدرى !!
و الناس اللي حواليكي هيكونوا اتعودوا انك شايلة كل حاجة لوحدك فا محدش هيساعدك..

مين فهمك انك فاشلة لو مش فى ايدك تحلى مشكلة من المشاكل اللى حواليكى دي كلها !!!
انتى مش مطلوب منك تصلحى الكون..
مش مطلوب منك تشيلى هم كل الكائنات الحية !!
انتى ما تقدريش على الهم ده كله..

اعملى اللى فى مقدرتك، اللى تقدرى تعمليه بظروفك الحالية..اللى بيحبك هيفهم ظروفك و ان دى مقدرتك و طاقتك..

عادى قولى لأ بأدب و اعترضى لو حد جه عليكى أو جرحك أو قابل معروفك بدقة نقص !!

اقعدى شيلى فى قلبك و استحملى اكتر و موتى نفسك من التعب عشان تثبتى للى حواليكى انك SUPER WOMAN .
بس مهما عملتى مش هتقدرى تعيشى الدور ده علطول بس هتكونى خسرتى صحتك و حياتك و اجمل سنين عمرك....

لازم تشاركي اللي حواليكي في المسئوليات دي من أول يوم...لازم يشيلوها معاكي..يحسوا بالمجهود اللي بتبذليه و يخففوا عنك شوية من حمله..
احنا مش عايشين لوحدنا و محدش بيحس بحد غير لما بيتحط مكانه..لو عملتي فيها البطلة الحديدية محدش هيتعب غيرك..

انت مش SUPER HERO .....!!
انتي انسانة من لحم و دم..
انسانة ليها حق تتعب و ترتاح شوية..
ما تجيش علي نفسك.. حبيها..

#Sarah_Elzahaby #‏شريك_الحياة #‏أدهم_و_جيسي

تعليقات

المشاركات الشائعة من هذه المدونة

الشخصية الهذائية

المراهقون و لغات الحب الخمس

الإفصاح عن الذات