تغلب على الكآبة

في وسط كل الاكتئاب اللي احنا فيه .. دي شوية نصايح كده ممكن تنفع و ممكن لأ:

1- أخرجوا .. روحوا أي مكان مش لازم جديد

2- إشتروا حاجه جديده حتى لو قلم بس تكون حاجه تبسط

3- أو إشتروا حاجه تتاكل بتحبوها أو نوع جديد منها .. التجارب الصغيره الجديده دي بتفرق

4- إبدأ أي حاجه جديده .. قرر تتعلم رسم .. تعمل أوريجامي .. تكتب .. تريكو .. طبخ .. أي حاجه تكون بتتطلب إن الواحد يركز في حاجه واحده و يشتغل و يركز بكل حواسّه مع الحاجه دي و هو بيعملها

5- لو عندك فكره راكنها .. إعملها خطه و سيرش و جوجل موجود و مفيش حاجه مش موجوده على الانترنت .. دي أكتر و أسرع حاجه تخرجك من حالة الكآبه.

6- خد دُش دافي و ركز مع صوت الميه .. ركز مع إحساسك بيها.

7- مفيش مشكله تبقى متضايق و مش طايق حد .. و مش قادر تستحمل حد .. في الحاله دي التزم الصمت أحسن عشان متخسرش حد و لا تضايق حد.

8- مفيش مانع من بعض القرارات المتهوّرة الصغيره .. تلغي إجتماع على آخر لحظه .. تبقى نازل الشغل و تاخد تاكسي متعرفش إنت عاوز تروح فين .. تروح سوبر ماركت مش عارف انت عاوز تشتري إيه .. في كل الاحوال لما تشتت تركيزك عن سبب الكآبه و تركز في أي حاجه حتى لو كان قايمة مشتروات البيت محتاجها .. أو حتى مش محتاجها .. ده ممكن يخليك أحسن كتير.

9- متتضايقش إنك مش قادر تاخد قرار في أي حاجه .. و لا إنك مش عارف تركب من الناحيه دي فتروح المكان س و لا تعدي الناحية التانيه عشان تركب و تروح المكان ص .. المهم بس ركز في إنك خارج عشان تعمل حاجه .. إيه هي مش مشكله

10- صحيح انت بتحاول تجرب حاجات جديده أو تشتري حاجات جديده عشان تحاول تخرّج نفسك من اللي إنت فيه .. بس خليك فاكر إن فيه حاجات مينفعش تجرّبها

11- حاول متتمسكش بحاجه معيّنه و تُصر إنها هي اللي هتبسطك .. إدي فرصه لحاجات تانيه كتير إنها تعرفك على نفسها و تسعدك.

12- للمرة التانيه إعملوا حاجات بإيديكم .. ركزوا أوي فيها .. هتاخدكم شوية من العالم الكئيب اللي إحنا فيه.

13- خليكم مصدّقين إن الفتره دي أكيد هتعدّي .. و إن مش عيب نكتئب و مش عيب نبقى مش مستحملين حد و لا حاجه

منقول