الحب بين الغيرة و الثقة

في حاجتين موجودين ف معظم العلاقات و الناس بتتلخبط بينهم جامد اوي..

الغيرة و الثقة..

نمسك الثقة:

لما خطيبك كل 3 دقايق و نص يسألك انتي فين و روحتي فين و هتيجي امتى و قابلتي مين و هل في شهود و لا لأ و يطلب منك أدلة جنائية و عينات DNA من المكان اللي كنتي فيه، دي ماسمهاش غيرة.. دي

أسمها مش بيثق فيكي و متوقع انك بتكدبي عليه..

الراجل اللي من النوع ده بيعمل كده عشان احتمال من الاحتمالات التالية:

-شايف ان انتي كتيرة عليه و انه مش مالي عينك و شاكك انك ممكن تقلبيه ف أي مومنت

-عموما ثقته بنفسه مهزوزة شوية و محتاجة مسمارين يثبتوها

-يعرف عنك ماضي أسود (لو كان ليكي ماضي أسود يعني)، و شاكك انك ممكن ف لحظة ضعف تحني إلى الماضي..

-من النوع اللي فاكر نفسه ناصح وعنده حساسية مزمنة للقرطسة.. أيوة في نوع من الناس كده.. حاسس إن كل الناس تتمنى تقرطسه و أنه حويط بقى و مش هيتقرطس.. و غالبا فعلا كل الناس بتقرطسه.. بس مش بيعمل دكر غير عليكي

-هو أساسا بيعمل بلاوي و ضميره فارشله الملاية في اللاوعي، و عدم ثقته فيكي مجرد إسقاط على نفسه...

صعبة شوية؟

نشرحها طيب..

أي حد بيعمل حاجة غلط حتى لو ضاربها جزمة و مش حاسس بأي تأنيب ضمير على مستوى العقل الواعي، لازم ضميره يكون بيأنبه على مستوى العقل الباطن.. و عشان العقل الباطن مش بيسكت و لازم يتصرف، أحيانا بيطلعها في شكل إسقاط.. يعني تفكيره يوسوسله إن إنتي اللي بتعملي بلاوي مش هو... و رد الفعل اللي كان المفروض يطلع على نفسه أصلا يطلع عليكي انتي..

الحلول:

-أوعي تتجوزي حد شايف ان انتي أعلى منه و كتير عليه.. هيطلع عين أهلك عقد نقص طول العمر..

-لو ثقته مهزوزة ثبتيها بمسمارين.. امدحي فيه و أشكري في قدراته و أظهريله حبك دايما

-إياك ثم إياك تحكي عن الماضي إلا لو كان ماضي مشرف.. ربنا ماقالش نفضح نفسنا.. دي مش أمانة و لا نيلة... ده عبط... الماضي تدفنيه ف الصحراء الغربية و تنسي انتي دفنتيه فين.. و عموما ماتحكيش لخطيبك أو جوزك الحالي عن أي خطيب أو جوز سابق أو راحل.. إلا لو بتشتمي فيهم

-أوعي بردو تتجوزي حد عرق النصاحة ناقح عليه و عنده حساسية مزمنة للقرطسه... لو مش لاقية عريس غيره أو كنتي خلاص اتدبستي و اتجوزتيه، خديه يتعالج.. عادي مافيهاش حاجة..

-أما بقى لو الموضوع إسقاط، ده لازم يتعرى قدام نفسه.. أشربي كوباية شاي بلبن و توكلي على الله و واجهيه بالحقيقة العارية... بس من غير ردح.. خليكي شيك..

‫#‏محمد_فايق‬

‫#‏شريك_الحياة‬

‫#‏أدهم_و_جيسي‬