الأب في حياة أبنائه

ابنك لو شافك داخل من باب الشقه وما سابش اللي في ايده عشان يجري عليك و يعملك فرح...و يقول بابا جه بابا جه....

او حتى مش ملاحظ وجودك من عدمه و ما فرقش معاه يقولك ازيك يا بابا و كمل لعبه عادي..

يبقي في حاجه مش مظبوطه في علاقتكوا كأب و ابن..

لازم تراجع اوراقك..ما تطنش..

دورك في حياه ولادك عمره ما كان مادي و بس..

طبعا الحياه صعبه و طلبات عيلتك مش بتخلص و ربنا يعينك..

بس ما ينفعش كل علاقتك بابنك تكون من خلال مامته..

من خلال سؤال في التليفون..

هما كويسين؟؟ هما كلوا؟ محتاجين حاجه؟ هو نجح؟

هتتفاجئ باخبارهم زي الغريب بمرور الوقت..

لازم يكون في عالم خاص بيك انت وولادك..مفيهوش حد غيركوا..

جربت مره تاخد ابنك في حضنك و هو بيعيط و تهديه لحد ما ينام....احساسك انه ارتاح و هدي معاك هيقربكوا من بعض اكتر..

بدل ما تشتكي من زنه و تسيب الاوضه و تمشي العب معاه..حايله...ده ابنك زي ما هو ابنها..

افتكر و انت صغير كان نفسك باباك يلعب معاك ازاي وقت اطول و اعمل ده مع ابنك..هاتله كوره و العبوا سوا و خليه يجيب فيك جوون و يفرح و يقلدك.. هتشوف نفسك جواه..هتشوفك و انت صغير..

جرب و اتفرج معاه على الماتش بدل ما تنزل مع صحابك هيقلدك في انفعالاتك و فرحتك بالجون..

هتحس انك بتشوف ماكيت صغير منك بيمشي على رجلين..

جربت تسرح لبنتك شعرها مرة و تقولها انها جميله..

كلمتك دي هتديها ثقه في نفسها متتصورهاش..

جرب و انزل لعالمها و العب معاها بعرايسها و مطبخها و اعمل انكوا صحاب..هتقضي وقت ممتع اكتر من و انت بتلعب بلاي استيشن مع صحابك..لان فرحه بنتك بلعبك معاها احساس فيه متعه محدش يقدر يحسسهالك غيرها..

هتبقي مشتاقة ليك كل مره تدخل أوضتها..مستنياك تخبط عليها و تعملك الشاي في الكوبايات البلاستيك بتاعة عروستها 

خد ابنك اللي عنده 4 سنين يصلي معاك و اخرجوا سوا..

كإنه صاحبك...هاتولكوا فشار و روحوا فيلم كرتون بيحبه..و شوف فرحته ساعتها..

انت اللي هتحتاج تكرر الخروجه دي لانك اتبسطت اوي أكتر منه..

مامته مش هتعرف تعلمه كل حاجه..

في حاجات لازم انت بنفسك تكون موجود بشخصك فيها

مش حاجات تتحكيلك و احداث تعرفها بعد ما تكون خلصت..

جرب تكون صاحب ولادك قبل ما تكون البعبع اللي بيخافوا من زعيقه و عصبيته..و اللي بيضرب و معندوش خلق يتكلم..

ما تحرمش نفسك من حضن ولادك و لحظات هتعيشها معاهم في سن مش هيتكرر تاني عشان شايف ده مش دورك..

انت مش خزنه بالنسبالهم..

و لا بنك فلوس بس..

و لا مارد بيحققلهم الطلبات..

ما تظلمش نفسك بالدور ده..

انت بطل حياه ولادك..

خليك قدها..

‪#‎Sarah_Elzahaby‬ ‫#‏شريك_الحياة‬ ‫#‏أدهم_و_جيسي‬