حوارات و اعترافات بين زوجين سعيدين :)

(( الجزء الأول ))
تفتكري يا جيسي ايه اكتر حاجه “محتجاها” البنت من شريك حياتها؟

سألت السؤال ده لجيسي واحنا في العربيه مروحين للبيت وصوفيا نايمه ورا من كتر تعب تنطيط اليوم

جيسي : اكتر حاجه محتجاها الزوجه من الواحدة …. مممممم الموضوع عاوز تفكير شويه

ادهم : خدي وقتك . قدامك ٣٠ ثانيه

جيسي : ههههه يا سلام . طيب يا سيدي بص . الموضوع عند البنات مختلف يعني الموضوع مش مجرد احتياج

ادهم : اومال ايه؟

جيسي : هتستغرب لو قولتلك انه توقع

ادهم : توقع ؟ يعني ايه توقع ؟

جيسي : يعني الانثى بشكل عام تركيبها الجسدي والنفسي اللي ربنا خلقه بيها بيكون متوقع حاجه معينه من الراجل اللي معاها

ادهم : وهي متوقعه ايه بقا ان شاء الله ؟

جيسي : الأمان

ادهم : الأمان ؟

جيسي : اه . الأمان . انها تحس بالأمان مع الراجل اللي هيا معاه

ادهم : ممممم يعني تقصدي ان انها تحس انها متأمنه يعني

جيسي : يعني ايه متأمنه ؟

ادهم : يعني عندها شقه بإسمها . حساب في البنك . مؤخر صداق كبير . عربيه . كدا يعني

جيسي : تؤ . لأ خالص . مش ده قصدي

ادهم : اومال امان ايه اللي بتتكلمي عليه ؟

جيسي : الأمان يعني محسش بخوف حتى لو بواجه الدنيا ديه كلها معاه
الأمان يعني ابقا مطمنه ليك ومغمضه عنيا وعارفه انك جمبي مهما حصل ليا 
الامان يعني اني ابقا متأكده اني ماشيه معاك على الطريق الصح حتى لو بنقع بس ماشيين على الطريق الصح
الأمان يعني مخبيش عليك حاجه ولا احس بتأنيب ضمير عشان خايفه اقولك على موضوع معين 
الأمان يعني حضن من القلب للقلب وقت ضيقه وشده 
الامان يعني اني ابقا متأكده اني اهم اولوليه في حياتك بعد رضا ربنا عننا
الأمان ان يبقا عندي يقين اننا هنكمل المشوار مهما كان وضعنا المالي والصحي 
الأمان اني الاقيك جمبي وفي ضهري حتا لو مطلبتش ده 
الأمان اني ابقا شايفه طريقتك في اداره حياتنا وكمان تعاملك مع بنتنا بشكل يخليني نايمه مرتاحه ومبسوطه
الأمان حاجات كتيرا يا أدهم . كتيرا اوي .

بقولك ايه . . تفتكر يا أدهم ايه هيا الطريقة اللي ممكن بجد الزوج يحسس بيها زوجتة بالأمان ؟

ادهم : مممم . بصي أفضل و أسهل طريقه هي . . .

صوت صوفي اللي صحت من النوم : ماما . . عاوزه اعمل بي بي

جيسي : هههه طريقه جامده جدا . يلا بقا بسرعه قبل ما بنتك تبهدل الدنيا
........................

((الجزء التاني))

قلت بصوت عالي وانا واقف في المطبخ : هعمل شاي ياجيسي أعملك معايا؟

لقيتها بتجري على المطبخ وبتقولي وطي صوتك ما صدقت صوفي نامت وبعدين انتا عارف مبحبش الشاي انا هعمل كافيه

ادهم : يابنتي انتي حارمه نفسك من اجمل كبايه شاي ممكن تدوقيها في حياتك

جيسي : هههه ايوا زي المره اللي قولتلي انك هتعمل اجمل سحور في الدنيا وصحيت لقيت كل السحور عباره عن ٦ انواع جبن مختلفه وبقيت عطشانه طول الصيام

ادهم : يابنتي انتي مش فاهمه . ده عشان ناخد ثواب اكبر . وبذمتك طعمها مكنش حلو

جيسي : هههه ايوا ايوا تسلم ايدك بتتعب كتير . بس قولي بقا انتا قولتلي في العربيه تحت ان سهل اوي الزوج يوصل احساس الأمان ده للزوجه

ادهم : طبعا . بس للاسف مش كل الرجاله عارفه المعادله السهله ديه

جيسي : انتا من اول ما اخدت الدبلومه بتاعت الاستشارات الاسريه وانتا عمال تطلع نظريات عالميه

ادهم : والله مش نظريات . الموضوع بجد عباره عن معلومات قيمه جدا بتحاول توصلها للناس بطريقه مناسبه لهم مش اكتر

جيسي : طيب قول بقا المعادله السهله اللي هتخلي بيها كل زوج يحسس زوجته بالأمان

ادهم : كلمه السر يعني

جيسي : اه . كلمه السر

ادهم : الدعم

جيسي : الدعم ؟

ادهم : اه . الدعم 
بصي يا جيسي اصل البنت منكم مش بتحب حاجتين 
ان حد يتفضل عليها او يمن عليها بحاجه
ولا ان حد يرمي عليها كل المسئوليه ويشيل ايده من كل حاجه 
والكلمه السحريه اللي هيا “الدعم” هيا بقا بين الحاجتين دول

جيسي : يعني ايه؟

ادهم : يعني البنت مش هتحس ابدا بالأمان لو كل شويه شريك حياتها حسسها انه بيصرف عليها 
وان طلباتها واحتياجتها حاجه المفروض تفكر قبل ما تطلبها او تتردد قبل ما تقول انا عاوزه 
انه يتعامل معاها كانها مش فاهمه حاجه وانها متقدرش تعمل حاجه الا من غيره 
وانه لازم يعرف كل خطوه بتعملها كأنها طفله صغيره لا يعتمد عليها
انه يعايرها مثلا عشان وزن زياده بعد الولاده او يقطمها عشان لقا حبه تراب مش عارف فين

والعكس برضوا مش هيحسسها بالأمان

جيسي : ازاي ؟

ادهم : انه يرمي عليها كل حاجه بمعنى الكلمه 
البيت وتربيه الاولاد ومذاكرتهم وتوصيلهم والمشاوير والدورس وبعض مصاريف البيت ويمكن بعد كل ده تكون بتشتغل كمان 
انه يرجع البيت باشا . كانه راجع فندق يرمي حاجته هنا و ميهتمش بالأولاد ده اذا قعد في البيت اساسا ومرحش القهوه او لصحابه 
الريموت في ايده . او الموبايل جمبه وعايش في عالم خاص بتاعه هوا وهي اللي تشيل كل حاجه وممكن هيا بتكون بتشتغل زيها زيه

جيسي : ممممم . اومال فين بقا الدعم

ادهم : الدعم ده اللي ربنا أمر بيه لما أمر الزوج بواجب الأنفاق 
يعني الانفاق ده مش اوبشن او حاجه بيتفضل بيها الزوج على الزوجه . لا . ده واجب عليه وحق ليها 
الدعم في ان يكون كريم في مشاعره قبل فلوسه 
الدعم في انه يراعي ظروفها الجسدية خصوصا بعد الحمل والولادة و ينزل يلعب معاها رياضه او يحجز لها في جيم مش يقولها انتي طخنتي 
الدعم انه يحتويها وده دوره اصلا مش يضغط عليها ويقلل منها ويتسلط عليها
الدعم يقولها شكرا على كل حاجه حلوه بتعملها 
الدعم انها يوصلها بالفعل والكلام انها ماليه عنيه وانه بجد من غيرها حياته تدمر
الدعم انها لو بتشتغل ميخدش من فلوسها اي مليم الا لو هيا اللي عاوزه تساهم في البيت 
الدعم ان حتا لو هي مش بتشتغل يشجعها تعمل حاجه مفيده لنفسها ولمجتمعها 
الدعم انه يربي معاها الاولاد . يعرف مشاكلهم . يذاكر لهم شويه 
الدعم في انه يقف يعمل معاها كبايه شاي في المطبخ ويقولها انتي حلوه اوي وانتي بتعملي كبايه الكافيه . ماتجيبي شفطه

جيسي : مممممم والله . ماشي يابتاع الدعم

ادهم : ههه مش بهزر والله . ساعتها بس هيا هتحس بالأمان 
يعني من الاخر لا يبقا خنقه وبيحاسب على الواحده 
ولا يبقا بايع القضيه وشايل ايده

جيسي : مممم يعني كلمه السر هي الدعم

ادهم : ايوا . بس مش واخده بالك اننا قاعدين نتكلم عن الزوجه وناسيين خالص الزوج . دحنا غلابه والله

جيسي : اه صح انتا سألتني في العربيه ايه اكتر حاجه محتجاها الزوجه من الزوج ورديت عليك 
قولي انتا بقا ايه اكتر حاجه محتاجها الزوج من الزوجه

ادهم : لما تدوقي الشاي . هقولك 😉
........................

(( الجزء الثالث ))

قفلت الموبايل وبصيت لجيسي وقولتلها : يعني انتي عاوزه إيه دلوقتي ؟

- انتا قولتلي امبارح لما كنا في المطبخ انك هتقولي اهم احتياج الزوج . مش انا قلتلك امبارح في العربيه ايه اكتر حاجه بنحتاجها من الرجاله وطلع كلامي صح ؟

= وفعلا طلع صح جدا . طب مبدئيا . الرجاله والبنات عندهم نفس الاحتياجات بشكل عام . لكن الاولويات ومدى اهميه الاحتياج هو اللي مختلف

- طبيعي . لاننا مختلفين اساسا . واحتياجاتي كبنت غيرك كراجل 

= بالظبط . جامعه هارفارد عملت بحث طويل عريض من خلال الانترنت سألت فيه اكتر من مليون راجل حول العالم عن ايه اهم احتياجاتك كزوج؟ تخيلي الاغلبيه اجمعوا على ايه ؟

- إيه ؟

= التقدير 

- التقدير ؟ اللي هو الاحترام يعني ؟

= لأ . التقدير حاجه اكبر من الاحترام . الاحترام هو التعامل السليم الحضاري مع أي حد . لكن التقدير هو الامتنان والشكر من جواك للشخص اللي قدامك وبتتعامل معاه على الاساس ده 
طبيعه الرجاله اساسا مجبوله على حب الحصول على الاحترام و التقدير من خلال الانجازات وتحقيق الذات والاهداف 
فيه واحد اسمه ماسلو عمل هرم مشهور جدا في علم الاجتماع سماه هرم الحاجات . وعلى رأس الهرم ده موجود الانجاز وتحقيق الذات 

- طيب معلش سؤال . انا كبنت ازاي اخلي شريك حياتي يحس بالتقدير اللي هو محتاجه ده ؟ 

= بسيطة اوي . عن طريق انك تعملي حاجات وحاجات متعملهاش 

- طب ايه الحاجات اللي اعملها ؟

= حاجات كتير يا حبي . اهمها . المدح . الكلام يعني . انتي عارفه يا جيسي . جامعه امريكيه بحثيه عملت اختبارات عن متوسط عدد الكلمات اللي بيقولها الراجل والبنت في اليوم . تخيلي البنت في المتوسط بتقول كام كلمه في اليوم 

- مممم مش عارفه . بس اكيد كتير . احنا بنحب الكلام اوي 

= ٢٠ الف كلمه 

- إيه ؟ 

= اه والله 

- طب والرجاله يا ادهم ؟

= الرجاله ١٢ الف كلمه . تقريبا بنبطل كلام لما نرجع البيت 

- هههه ظريف اوي حضرتك 

= السؤال بقا . كم كلمه من ال ٢٠ الف كلمه اللي بتقولهم البنت بتكون كلمه مدح او شكر او تقدير لشريك حياتها 

- مممممم . مش كتير . انا فاهمه ان البنت هيا اللي محتاجه موضوع الكلام ده والاعجاب بشكلها وبلبسها و كدا يعني 

= صح . والراجل كمان بس بشكل تاني بعيد عن الشكل شويه . 

- زي إيه يعني ؟

= زي التشجيع . التشجيع هو البنزين اللي ممكن نكمل بيه اليوم . التشجيع ده هو اللي بيخلينا عاوزين ندي اكتر بيخلينا نحس اننا كويسين و بنحقق اهداف نقدر نسعد بيها زوجاتنا واولادنا . وعلى فكره يا جيسي العلاقه بين تقدير الزوج واحترام الزوج للزوجه علاقه طرديه 

- يعني ايه ؟

= يعني كل ما تقدير الزوجه للزوج اكتر كل ما احترمها وراعى احتياجتها وشعورها اكتر 

- طب ايه تاني غير التشجيع يا ادهم ؟

= مممم انها تتكلم معاه عن طموحه . احلامه . فكره انها تعجب بيه وتوضحله ده . مفيش زوجه مش معجبه بزوجها . لانها بتحبه بجد . هو المطلوب منها انها توضح ده تتكلم عن ده. انها تحسسه برجولته باستخدام انوثتها . عارفه . لو كل زوجه حست بأن جوزها هو فعلا بطلها وجوزها استشعر ده بجد . صدقيني نص مشاكل العلاقات الزوجيه هتتحل.

- طب ديه الحاجات اللي تعملها . ايه بقا الحاجات اللي متعملهاش ؟

= ياااااه . حاجات كتير يا جيسي . مثلا . انها متقللش مش شأنه او تستخف بيه وبرأيه او تهين رجولته وديه حاجه حساسه جدا للرجاله . كمان انها متتكلمش عن عيوبه مع اي حد او تقول اسرارهم لاي حد مهما كان . ممممم . اه فيه موضوع مهم جدا 

- ايه هو ؟

= مشكله بعض الزوجات انها بتاخد اغلب اللي بيعمله جوزها على انه مسلمات . عادي يعني . بيشتغل زي اي حد . فيها ايه . بس هي بتضايق جدا لما يستخدم الزوج نفس الاسلوب السلبي ده معاها لما يقولها : انتي بتعملي ايه زياده . بتحملي و تربي وتهتمي بالبيت وتطبخي ويمكن كمان بتشتغلي . زي ملايين البنات يعني . عادي 
الطريقه ديه بتخلي بشكل غير مباشر الراجل مش عاوز يرجع البيت . تخيلي معايا . واحد راجع تعبان طول اليوم من الشغل وقرف اليوم . يرجع يلاقي واحده بتقوله انتا اتأخرت ليه . انتا مش بتحبني . انتا مش مهتم . حاجات تخلي الراجل يخترع اي حوار علشان يبعد عن البيت ويكبر دماغه وتبدأ بقا الخناقات . 

- عندك حق . كله الا موضوع الخناقات ده يا ادهم 

= مالها الخناقات . ديه جميله اوي 

- جميله ؟ اعوذ بالله . ايه الجميل فيها 

= هو انا مقولتلكيش ؟

- لا . مقولتش . قول 

= مش في الدبلومه عرفت ازاي نتخانق مع بعض ومن خلال الخناق نقرب من بعض اكتر 

- نتخانق و نقرب من بعض في نفس الوقت ؟ ازاي يعني ؟

= لأ ده حوار تاني بس هيعجبك اوي 

- طب قول يا ادهم 

= لأ بكره بقا ان شاء الله 
................

((الجزء الرابع))

- ها يا سيدي . ازاي نتخانق ونقرب من بعض في نفس الوقت 

= ممم سؤال مهم . بس انا هسألك سؤال تاني . امتا اخر خناقه كانت بينا ؟

- ممممم آخر خناقه . . . . . 
والله ما فاكره . ايه ده . امتا بجد ؟

= اها . هو ده . احنا مش بنتخانق . احنا بنختلف في وجهات النظر و بعدين بندير الخلاف ده بشكل سليم فمش بنوصل للخناق لان هدفنا المصلحه . يا اما بقنعك يا اما بتقنعيني. واحنا اساسا دماغنا واحده لانِك صديقي الصدوق 

- يعني الخناقه بتحصل لما مش بندير خلافنا بشكل سليم ؟

= بالظبط . فيه اتنين ممكن يختلفوا وهما مبتسمين وبيستفيدوا من افكار بعض . وفيه اتنين ممكن يختلفوا وهما بيقطعوا في لحم بعض 

- ههههه طيب ولو اتخانقنا يا ادهم ازاي نقرب من بعض زي ما قلت ؟

= بصي يا ستي . هما ٥ طرق . ضمانه حقيقيه لاي اتنين لو حتى بيتخانقوا كل يوم هيقربوا من بعض اكتر 

- يا سلام . الطريقه الادهميه للخناقه الرومانسيه 

= هههههه عنوان مقال على الصفحه تحفه . بس هيا مش طريقتي . ديه حاجه درستها في الدبلومه بتاعت الإستشارات الأسريه 

- طب قول الطرق ال ٥ 

= اول حاجه يوضحوا هدفهم من الخناقه 

- يعني ايه ؟

= يعني يركزوا كدا على سبب الخناقه . هل هو مخنوق من الشغل وجاي يطلع التعب عليها ولا هيا قرفانه من العيال و مصدقت لقت حد تنفجر فيه . 

- طب وده يتعرف ازاي ؟

= بإن واحد منهم يسأل التاني . احنا مختلفين على ايه بالظبط ؟ السؤال ده يبجرد اي مشاعر او بيمنع ان مشاعر خارجيه او دفاتر قديمه تتفتح . 

يعني مثلا لما يسألها . حبيبتي . احنا مختلفين على ايه اساسا ؟
ترد تقوله : انك رجعت متأخر ومتصلتش بيا . انتا مش مهتم . 

افضل رد بقا : حضن او يمسك اديها ويقولها باهتمام حقيقي بجد مكنش قصدي انا منستش بس انشغلت فعلا وبعدين انا اهوه في حضنك ومعاكي. 

- مممممم قول قول انا دلوقتي بترجم حاجات كتير حصلت 

= ههههه اصل لو محصلش التركيز على الموضوع الاساسي عارفه هيحصل ايه ؟

- ايه ؟

= هقولك 

السلام عليكم 

وعليكم السلام . . . 

فيه ايه مالك ؟ مضايقه من ايه ؟

مفيش . . . .

لأ فيه . مالك بجد . حد حصله حاجه ؟

لا الحمد لله 

اومال مالك ؟

مانتا مش حاسس بأي حاجه ؟

ايه هو اللي مش حاسس بحاجه ؟ فيه ايه يابنتي ؟

مفيش حاجه خلاص . هقوم احطلك الغدا . قصدي العشا . . 

غدا ايه وعشا ايه بس . انا عاوز افهم مالك ؟

مفيش . انا قاعده طول اليوم في البيت واتصلت بيك كذا مره وانتا معبرتنيش 

اه . معلش كان الموبايل صامت ومعرفتش ارد 

ياسلام . سبحان الله . طبعا وترد عليا ليه . مانتا بترد على اصحابك 

اصحابي ؟ مالهم اصحابي بقا ؟

مفيش . سي احمد كل ما يقولك يلا ننزل تنزل جري كأنك عاوز تهرب من البيت ؟

جري ؟ وفيها ايه يعني لما اخرج مع اصحابي شويه 

وانا بقا مخرجش مع صحباتي ليه كمان ؟ ولا انا بقا بس مهمتي اربي الولاد واهتم بالولاد 
(ساعات بتكون بتشتغل كمان)

فيه ايه مالك بتتكلمي ليه كدا . كل ده علشان مردتش على الموبايل 

لا. انتا مش مهتم . انتا مبتحبنيش وانا طالعه عيني في البيت طول اليوم 

ايه هو ده . وانا يعني بلعب يعني . مانتي عارفه انه طالع عين اهلي في الشغل ومبلحقش اساسا اعمل حاجه . انتي جايه على الكام ساعه اللي بقعدهم مبسوط . ماشي يا ستي . سيبهالك علشان ترتاحي 

ترااااااخ (صوت الباب بيتقفل) 
(نزل وهيتصل على احمد وهيتقابلو على القهوه علشان يفضي دماغه)

جيسي : مممممممممم ده فيلم هندي 

ادهم : هههه لأ ده فيلم مصري . بس مش كل الازواج كدا على فكره . فيه ناس كتير فعلا واعيه ومش بتنساق ورا الانفعالات وبتتحكم في الموضوع من البدايه بشكل ذكي و بتركز على الموضوع الاساسي وبتتعامل معاه بحكمه وحب . 

- ماشي . حلو اوي . يعني لما نتخانق نركز على الموضوع المختلف عليه ومش ننساق لاي مشاعر تانيه او نفتح دفاتر قديمه . ايه بقا الطريقه التانيه ؟
........................

((الجزء الخامس))

- اديني نيمت صوفيا . . الدور عليك بكره . حبيبتي بتقولي بابا مكمليش القصه بتاعت سيدنا نوح . متنساش بكره تكملها القصه و كملي انا بقا موضوع امبارح والطريقه التانيه

= اعرفي حدودك ؟

- نعم ؟

= بقولك اعرفي حدودك

- فيه ايه يا ادهم ليه بتتكلم كدا

= هههه يا بنتي ديه الطريقه التانيه اللي تخلي كل اتنين يقربوا مع بعض حتى لو اختلفوا

- ممم .. ويعني ايه بقا اعرف حدودي

= الكلام مش ليكي . الكلام لاي اتنين . الزوج او الزوجه . لازم يعرفوا حدودهم كويس اوي في التعبير عن مشاعرهم او افكارهم او خلافاتهم وإلا هيحصل مصايب

- يعني ممكن يحصل ايه مثلا ؟

= انتي وخيالك بقا يا جيسي . من اول الكلمات الجارحه في اللي بتهز الثقه في النفس وسط الكلام زي مثلا انه يقولها انتي مش فاهمه حاجه . لحد بقا التجريح والشتيمه المباشره وساعات والله يا جيسي الضرب

- الضرب ؟ وازاي تسمحله بكدا

= ايوا . اديكي قولتيها . ازاي سمحتله . الموضوع مش بيدأ بانه يضربها كدا علطول . لا . اغلب النوع ده من اشباه الرجال بياخد الموضوع خطوه خطوه . تهزيق بسيط من ايام الخطوبه مع عصبيه بإسم الرجوله والغيره وانه حمش . وهي للاسف ممكن تكون مبسوطه من ده . شويه شويه . يبقا التهزيق مباشر ومعاه قفل السكه في وشها على تقطيم وزعيق ويستخدم بعض الالفاط الخارجه اللي مش موجهه ليها . بس شويه شويه بعد لما يتأكد ان مفيش مقاومه من اللي قدامه . يبدأ يشتم بهزار مثلا يقول يا كلبه . يا حماره . انتي غبيه اوي . ومستحيل طبعا يقبل الهزار ده منها . وطبعا تطور الامور بيوصل لانه بيمد ايده عليها وساعتها فعلا بتقع من نظره ومش بيكون لها كرامه او اي قيمه عنده . وبيكون هو وصل لمرحله بعيده كل البعد عن الرجوله وعن المنطق والدين .

- ده صعب اوي يا ادهم . هو فيه بنات بتقبل كدا

= للأسف اه . لأسباب كتير يا جيسي . بس الواعيه هيا اللي تحط حدود لشريك حياتها . مفيش حاجه اسمها مفيش كرامه بيني وبين زوجي . الكرامه هي اساس العلاقه الانسانيه المحترمه . ممكن نقول مفيش فرق بينا في حاجات كتير لاننا بندعم بعض . لكن غير كدا يبقا تنازل عن قواعد اساسيه في علاقتها مع شريك حياتها .

- طيب الراجل يا ادهم . ازاي يستخدم موضوع الحدود ده

= انه يبقا حكيم ويفهم دوره كرب أسره وكزوج وكشريك حياة 
انه يبقا واعي ان اي تعدي مهما كان حتى لو نفسي على شريكه حياته هيرجع عليه بالسلب وكمان على اولاده

- فعلا انا لما نفسيتي بتبقا تعبانه بيأثر على كل يومي وعلى كل حاجه . على البيت . على الاولاد . وعليك طبعا يا حبيبي ههههه

= ايوا . . وهو ده بقا اللي اسمه النكد

- ايه ده !!؟؟ انتا بتصدق موضوع ان الستات نكديين فعلا يا ادهم

= بصي . خلي موضوع النكد ده له قعده تانيه لان طلع له احصائيات و ارقام وحوار طويل . بس انا هقولك رأيي . لو حتى فيه نكد بيكون من الست . فأنا مؤمن ان ده إحباط من شريك حياتها . مؤمن ان الراجل معرفش يدير العلاقه صح وعلشان كدا هيا محبطه نفسياً وعاطفياً . والجانب النفسي والعاطفي هو البنزين اللي بيشغل اصلا حياة الانثى . ان تحس انها محبوبه . انها مرغوبه . انها بتهتم بحد ويهتم بيها . انها محترمه ومقدره من انسان بتحترمه وبتقدره بالمثل . انها تعيش حاسه بالأمان مع انسان كل هدفه انه يشاركها مستقبلهم .
انا مؤمن . ان لو فيه زوجه نكديه ان السبب في جوزها مش فيها هيا وان النكد ده انعكاس لتقصيره في مهامه وواجباته.

- مممم يعني افهم من كدا ان الطريقه التانيه هي اننا نلزم حدودنا لما نختلف . يعني نلغي موضوع الصوت العالي . الزعيق . التهزيق . التقطيم . قفل السكه في وش بعض . المقاطعه . مد الايد . الاهانه . التجريح اللفظي او النفسي

= تمام جدا . وبكدا هيضمنوا انهم حتى لو مختلفين فهما بيحترموا بعض وان الخلاف مهما طال او مهما كان على ايه هيكون خلاف سليم ميدمرش العلاقه . وده اهم حاجه في اي علاقه . الاحترام .

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

مع كل الاختلافات ديه كان فيه حاجات مشتركه كانت هيا حجر الاساس اللي وقفنا عليه انا وجيسي عشان نبني علاقتنا بشكل سليم
الاسلام والعلم
هي ديه مرجعيتنا اللي بنينا عليها علاقتنا
خلاص مبقاش فيه نظريه شرقيه للزوجه
او نظره غربيه للتعامل مع الاصدقاء
بقا فيه نظره ربنا للموضوع ده
بقا فيه نظره للزوجه بشكل سليم زي ما ربنا قال وزي ما الرسول كان بيعامل زوجاته
خلاص مبقاش فيه نصائح وامثال ملهاش دعوه باي منطق او دين
بقا فيه بحث عن احدث الاساليب العلميه في تطوير العلاقه الزوجيه
ومن ساعتها بقت كل امور حياتنا بنبص لها من المنظور ده
وبقينا نكتشف اكتر واكتر كل يوم قيمه القرار ده في استقرار اسرتنا
في تعليمنا اسس حياتنا
في معرفه حقوقنا وواجبتنا
في تطوير علاقتنا بشكل مستمر مع علم تطوير العلاقات الزوجيه اللي بقا بعد كدا تخصص دراستي وشغفي
الموضوع عامل زي اتنين واقفين جمب بعض
بس واحد باصص يمين شويه والتاني باص شمال شويه
والاتنين بدأوا يمشوا على الطريق
في الاول مش هيبان انهم بيبعدوا عن بعض
بس بعد فتره المسافه اللي بنهم هتكبر
وبعد فتره اكبر الاتنين مش هيشوفوا بعض
انما لو المرجعيه واحده فالموضوع عامل زي اتنين ماسكين ايد بعض وماشين علطول في طريق واحد بيمروا بنفس التجارب ونفس التحديات وبيعدوها سوا
امسكوا في ايد بعض واتفقوا على القيم اللي هتعيشوا بيها
اختلفوا ولكن احترموا بعض
اتكلموا وصارحوا بعض عشان تقدروا تفهموا بعض
احلموا مع بعض عشان اهدافكم تكون واحده
اتعلموا ازاي تحبوا بعض عشان مشاعركم توصل لشريك حياتكم

ديننا الحنيف و العلم الحديث هو سر علاقتكم الزوجية الناجحة


.......................................

مش دايما الراجل اللي لازم يكون فارس الاحلام

انا تجربتي بتقول عكس كدا خالص

واكتشفت ده بعد الجواز مش قبله

اصل بص. اي بنت مهما كان معرفتك بيها كويسة مش هتعرفها كويس إلا بعد الجواز

لما تشوف أنها بتفضلك على نفسها في كل حاجه حتى في الأكل

لما تستغرب من كم التفاصيل الصغيره اللي مهتمة بيها عشان راحة حضرتك

لما بتبان حقيقتها في المواقف الصعبة وتلاقيها واقفة جمبك أجدع من ميت صاحب

لما عشانك تعمل حاجات كتير مش مقتنعة بيها بس عشان تريحك وبتحبك

لما تشوف تعب الحمل عليها ولسه برضوا بتعمل كل حاجه من قلبها

لما تشوف الم الولاده وتشوف تعب الرضاعه وتستغرب ازاي لسه مهتمة بيا و بالبيت

لما بتسهر جمبك وجمب عيالك وانتوا تعبانين وتكون هيا كمان عيانه بس مخبيه وتقولك عندي حساسية من الجو

لما مبتفهمش ازاي عرفت تدبر بالمصروف اللي معاها كل حاجه انتوا محتاجنها وتتصدم لما تكون مزنوق تقولك متقلقش انا عامله حسابي و حوشت

او لما بتكون مش لاقي مفاتيحك أو موبايلك أو أي حاجه بتاعتك وبتكون عاوز تنزل بسرعه ولسه هتقول مش لاقي الحاجه تلاقيها واقفه جمبك و في ايدها الحاجه

أو لما تتزنق في عزومة مستعجلة وتفاجأها وتكون مش محضره حاجه وفي ساعه زمن تلاقي اجمد سفره معموله

ولا لما تشوف قدرتها الغريبه على أنها تحتوي طفلك اللي تحس أن فيه كتالوج اتوزع وانتا مخدتش نسختك منه

لما تكون مخنوق من حجم محفظتك في جيبك وبالصدفه تفتح شنطتها عشان تلاقي بامبرز على مناديل على سندوتشات على لعب على بسكوت على عروض توفير على ميت حاجه وأهمها صوره الاسره اللي مجتمعه في رحله ما

لما بتشوف يوميا أنها بتنام بعدك وبتصحا قبلك ولا بتتكلم ولا بيبان عليها وانتا من قعدة مكتب 8 ساعات عاوز تأنتخ على الكنبة بقيت اليوم

كل ده وممكن تكون بتشتغل زيها زيك

لما بتلاقي أن قمه سعادتها و فرحتها لمتكم حواليها

دايما محسساك انك أهم و أعظم راجل في الدنيا وانتا اصلا بتكعبل في كرشك

لما تقولك ربنا يخليك ليا و تشوف في عنيها لمعه وتفهم أنها بتفتكر أحلى ايام بنكم

يا ربي لك الحمد كما ينبغى لجلال وجهك وعظيم سلطانك

انا مراتي فارسة أحلامي

اللهم اجعلها قرة عيني واجعلني قرة عينها

قولو آمين

‫#‏شريك_الحياة‬

‫#‏ادهم_و_جيسي‬