افصل بين ظروفك الخاصة و طريقة تعاملك مع الآخرين !

بحترم اوي الناس اللي بتعرف تفصل...

اللي مش بتمشي تخبط في كل الناس عشان مزاجها مش رايق..

اللي بتعرف مين اللي مزعلها و مين اللي ملوش ذنب..

مش ماشي بزعابيبه و مطرح ما تيجي تيجي..

مش عشان متخانقة مع جوزك تنكدي علي صحباتك واحدة واحدة و تعامليهم وحش..

مش عشان شديت مع مديرك تسود عيشة اللي حواليك..

مش عشان مشربتيش مج النسكافية بتاعك تطلعي زرابينك علي البشر..

الفصلان ده نوع عالي أوي من النضوج و الاحترام..

الانسان اللي بيفصل ده بيحترم نفسه لدرجة تفرض عليك تحترمه..

بيتحكم في اعصابه عشان ما يزعلش حد منه..و دي كفاية عشان ترفع ليه القبعة..

ما بياخدش ذنب حد بحد..

بيفكر... مش ضاربها صرمة و اللي يزعل يتفلق..

و حتي لو اتعصب شوية بيلم الليلة و بيعتذر..

محدش مجبر يستحمل حد..

و اللي بيستحملك بيكون محبة منه مش واجب عليه..

مستحملك جدعنة لكن ده مش حق مكتسب..فا تسوق فيها و تيجي عليه أكتر و أكتر..

ممكن اللي بتيجي عليه كل مرة ما يكونش في موود انه يستحمل عصبيتك و قلة ذوقك لأن هو كمان عنده ظروف..

في صداقات عمر بتضيع عشان اتنين ما عندهمش مبدأ الفصلان..

في جوازات بتبوظ عشان الزوج مش بيفصل فا بيضرب مراته من الضغط اللي فيه او عشان زوجة مش بتفصل فا منكدة علي جوزها ليل نهار..

في مبدأ في العلاقات الانسانية بيقول:

ظروفك الخاصه ... لك وحدك ! وأدبك في الگلام ... حق للجميع ! لا تخلط مشاگلك ،، وظروفك النفسيه ،، بـ تعآملك مع الآخرين..

نستحمل بعض ده حقنا على بعض لكن في حدود لكل حاجة..

ركزوا مع الفصلان عشان مريح جداً ليك و لغيرك..

مش هيخليك على الاقل بتحرق في دمك طول اليوم و بتغلي عشان حد ضايقك..

و مش هتخسرك صديق عمرك في لحظة غضب بالعكس هتزود حبايبك و احترام الناس ليك يوم ورا يوم..

الفصلان ده أدب و تربية و دماغ متكلفة..

خليك راقي و افصل..

‫#‏الفصلان_نعمة‬

‪#‎Sarah_Elzahaby‬ ‫#‏شريك_الحياة‬ ‫#‏أدهم_و_جيسي‬