قواعد التربية الأربعون

قواعد التربية الأربعون

1- زي كل شيء، إبدأ بالنية و راجع نيتك كل فترة..

2- تربيتك لأطفالك تبدأ من قبل الزواج باختيارك لشريك حياتك اللي بيشارك معاك نفس الأهداف في التربية.

3- ابنك ليس ملكك بل هو هبة من الله أنت مؤتمن عليها و على تربيته كما يحب و يرضى.

4-ابنك ليس أنت. هو شخصية مستقلة بذاتها و لم و لن يكون مطابق لك أو لأي أحد آخر.

5-بناء على ذلك، ما تحملوش أولادكم تحقيق أحلامكم المهدرة ، سيبوهم يحلموا و يحققوا أحلامهم بأنفسهم و ما تحملوهمش فوق طاقتهم عشان تعوضوا إحباطات الماضي

6-انت لست أباك أو امك و ليس كل ما ربياك عليه صحيح حتى لو كنت تحبه او تفضله او معتاد عليه. راجع كل ما تؤمن به مع المبادئ التي تريد ان تغرسها فيه.

7-ابنك يمثل جيل مختلف عنك .. احترم رغباته و اهتماماته المختلفة عن رغباتك و اهتماماتك. لازم تربيتك له كمان تختلف باختلاف الزمان و المكان مع ثبات المبادئ.

8- ابنك هيعمل اللي بتعمله مش اللي بتقوله. ولادك مابيسمعوش كلامك قد ما بيشوفوا تصرفاتك و يقلدوك بغض النظر عن اللى بتقوله

9- الطفل إنسان كامل يستحق ان يعامل باحترام مثله مثل اي شخص آخر.احترمه و عامله باحترام، هيحترم نفسه و غيره لما يكبر.

10- لو عايز ابنك يتكلم معاك و يسمعك لما يكبر اسمعه و اتكلم معاه و هو صغير. انزل لعقل ابنك .. و ما تطلبش منه يطلع هو لعقلك. لازم كمان تكون فيه بينكم هوايات مشتركة. حاول تشوف هو بيحب إيه و تتعلمه و تعرف عنه حاجات عشان تزيد المساحات المشتركة. لو بيلعب فيديو جيم جديدة، اتعلمها انت كمان و العبها معاه. لما يكبر شوية، خليه يناديك يا صاحبي..

11- زي ما هتشترك معاهم في ألعابهم، أشركهم في أعمالك ، خلي طفلك يعمل أعمال النجارة معاك .. و دخلي طفلك المطبخ يخبز معك كعكة

12- عشان تعلم ابنك ازاي يفكر و يستنتج الاختيار الصح من غير ماتقوله عليه، اعط له القدرة على الاختيار من و هو صغير في الأمور الصغيرة و تدرج معاه و هو بيكبر ..حتى لو أخطأ في بعض الاختيارات، خليه يتحمل عواقبها بدون تأنيب ما دامت لا تمثل خطر عليه أو تسببله مشاكل دائمة

13- مش كل حاجة غلط يعملها ابنك تقوله عليها لا و الا هاتتحول لجهاز تسجيل. خليها في الحاجات المهمة فقط.

14- عبر عن مشاعرك لابنك بصوت عال .. و خليه يحس دايما بحبك له

15- اياك تخليه يحس ان حبك ليه مشروط بأي حاجة نجاح دراسي او رياضي او غيره ، انت بتحبه لانه ابنك او بنتك بس مش محتاج اسباب، ده اللي هيخليه برضه يحبك من غير شروط

16- مهم جدًا تفهم مشاعر أطفالك و تعلمهم ازاي يعبروا عنها بطريقة صحية. حتى المشاعر السلبية.

17- زي ما بتكتم غصبك أمام الغريب ..فأولادك أهم و أولى إنك تكتم غضبك أمامهم. ماتطلعش ضيقك من كل حاجة فيهم

18- حاول تركز انك تشوف الحاجات الكويسة اللى فيه مش تشوف بس العيوب و تتمنى المميزات اللى عند ابن طنط عواطف و طنط مها و ابن خاله و ابن عمه. انتبه للحاجات الصح اللي بيعملها و شجعه بطريقة مناسبة بدل الالتفات للأخطاء فقط و التفكير في العقاب.

19- شايف فلان ابن عمو فلان .. ليه متبقاش زيه.. غلط جدًا... متعاملش طفلك على انه في سبق ولازم يطلع الاول

20- كذلك، كل واحد في ولادك كائن مستقل..ارحمهم من المقارنة ببعض!

21- علمه انه كل يوم يطور من نفسه من غير مقارنات و شد عصبي يتزرع جواه من الصغر

22- ماتخليش الولاد ماتش بينك و بين الطرف الآخر فتكسر العقاب أو قواعد البيت مثلًا عشان تخليهم يحبوك اكتر من الطرف الاخر!

23- مهم جدًا الثبات على القواعد و القوانين و عدم تغييرها على حسب مزاجك و إلا هيتلخبطوا و مش هيقدروا يمشوا عليها

24- و انت بتربي ولادك ساعات هتلاقيهم هم كمان بيربوك. انتهز الفرصة و حسن من نفسك.

25- ابنك ح يحاسبك بالظبط زي ما بتحاسبه.

26- اوعى تكذب عليهم او تخلف وعودك معاهم. مهم جدا يثقوا فيك و في كلامك. لو مش هاتقدر تعمل حاجة، متوعدش بيها.

27- لو في يوم حكى لك حاجة غلط عملها او بيفكر فيها اياك تعايره بيها في المستقبل ، لو حكى لك حاجة اياك تنقلها لحد تاني ، هتخسر ثقته للأبد و مش هيفتح قلبه ليك تاني

28- متستخدمش أسلوب التخويف في تربيتهم. اشرب اللبن و إلا هاتروح للدكتور و يديلك حقنة. الأساليب دي فاشلة و عفى عليها الزمن.

29- إبني إبنك ... قبل ما تبني له ...

30- التحضير للمواقف الجديدة مهمة لإزالة الرهبة (دكتور الاسنان، المدرسة، الخ) كلمهم و اشرح لهم إيه اللي هيحصل بالتفصيل حتى لو كانت حاجة مزعجة و جاوب على كل اسئلتهم بهدوء و صبر.

31- ماتتعاملش معاهم على انهم مابيفهموش...افتكر دايما انهم بيفهموا و بيحسوا بكل حاجة

32- متستسهلش في كل حاجة. فيه حاجات كتير ممكن تاخد منك مجهود شوية في البداية لكن بالتمرين و الاصرار هتفيدهم و تفيدك. زي مثلا تعويدهم على الاعتماد على نفسهم في ترتيب غرفهم و خلافه. يمكن يكون اسهلك في البداية تعملها بنفسك بدل ما تعلمهم و تصبر عليهم، لكن على الزمن الطويل التعب بييجي بفايدة كبيرة

33- قضي مع كل طفل وقت على انفراد، خرجه في مكان بيحبه و اتكلموا مع بعض بدون ضغوط. الكلام للأب و الأم على حدة.

34- اقرالهم كتب و قصص كل يوم على الأقل ربع ساعة فقط..

35- افتكر إن ما وضع اللين في أمر الا زانه و ما نزع منه الا شانه

36- علمهم الرحمة بالآخرين و بالحيوانات. خليهم يشاركوا معاك في أعمال الخير من بدري.

37- علمهم إزاي يتسامحوا بإنك تتسامح معاهم و مع الغير

38- الاعتدال مطلوب. متجيبلهمش كل حاجة نفسهم فيها فيطلعوا مدللين و يستهينوا باللعب و الفلوس و لا تحرمهم من كل حاجة فيطلعوا محرومين. لازم يحسوا بده شوية و ده شوية و ان فيه حدود لطلباتهم.

39- عوّد ابنك أن يلجأ إلى الله ، علمه ازاي يدعي ربنا ويطلب منه العون والقوة ... علمه ازاي يقول الحمد لله حتى في أسوأ الظروف ... علمه يستغفر ربنا لو عمل حاجة غلط.

40- رغم كل المتاعب و الصعاب و الضغط العصبي الجسدي، إلا ان كله بيهون مع كل.خطوة صغيرة و حاجة جديدة بيتعلموها حاول تستمتع بالموضوع و تشوف الصورة كاملة لأن الأوقات دي مش هتتعوض.